एजेन्सी । भारतमा कोरोना संक्रमितको संख्या बढिरहेको छ र उनीहरुको उपचारमा आवश्यक पर्ने मेडिकल अक्सिजनको पनि कमी छ । नियन्त्रणबाहिर पुगिसकेको यस अवस्थामा चीनले सहयोग गर्ने इच्छा दर्शाएको छ ।

भारतको केन्द्रीय स्वास्थ मन्त्रालयले पनि विदेशबाट मेडिकल अक्सिजन आयात गर्नेबारे विचार गरिरहेको छ ।

तर उसको जोड चीनभन्दा पनि खाडी देश र सिंगापुरबाट अक्सिजन आयात गर्नेमा छ । कोभिड १९ लाई सिंगो मानवताको शत्रु बताउँदै चीनले अन्तर्राष्ट्रिय एकता र परस्पर सहयोग जरुरी रहेको जनाएको छ । चीनको विदेश मन्त्रालयले बिहीबार भनेको छ, ‘भारतको गम्भीर हालतलाई हामीले ध्यानमा राखिरहेका छौं । यहाँ, महामारीबाट लड्नका लागि जरुरी औषधिको तत्काल कमी छ ।’

भारतले अघिल्लो वर्ष चीनबाट मेडिकल उपकरण मगाएको थियो । यसमध्ये अधिकांशका लागि व्यापारिक सम्झौता गरिएको थियो । दुबै देशले दक्षिण एशियाली देशहरुमा कोरोना खोप निर्यात गरिरहेका छन् । तर, अब देशभित्रै गहिरिँदो कोरोना संकटका कारण भारतले खोपको निर्यातमा आधिकारीक रुपमा रोक लगाइदिएको छ ।

काठमाडौं । भारतमा पछिल्लो २४ घण्टामा एकैदिन थप तीन लाख ३२ हजार ७३० जनामा कोरोना भाइरस (कोभिड–१९) को संक्रमण पुष्टि भएको छ । भारतीय स्वास्थ्य मन्त्रालयका अनुसार सो अवधिमा कोरोना संक्रमणको कारण २ हजार २६३ जनाको मृत्यु भएको छ ।

यससँगै भारतमा कोरोनाबाट संक्रमितको हुनेको समग्र संख्या एक करोड ६२ लाख नाघेको छ । त्यस्तै एक लाख ८६ हजार ९२० जनाको संक्रमणको कारण निधन भएको छ । भारतमा कोरेनाका सक्रिय संक्रमितको संख्या पनि २४ लाख २८ हजार नाघेको छ ।

पछिल्लो २४ घण्टामा भेटिएका महाराष्ट्रमा सबैभन्दा धेरै ६७ हजारभन्दा बढी नयाँ संक्रमित फेला परेका छन् । उत्तर प्रदेशमा पनि ३४ हजारभन्दा बढी नयाँ संक्रमित फेला परेका छन् । दिल्ली र केरलामा पनि २६ हजारभन्दा धेरै नयाँ संक्रमित फेला परेका छन् । कर्नाटकमा नयाँ संक्रमितको संख्या २५ हजारभन्दा धेरै छ ।

भारतका केही राज्यले कोरोना संक्रमण नियन्त्रणका लागि लकडाउन गरिरहेका छन् । तर, यसले कोरोना संक्रमणमा भने कमी ल्याउन सकेको छैन । भारतमा अहिलेसम्म १३ करोड ५४ लाखभन्दा बढी डोज खोप मानिसहरुलाई लगाइसकिएको छ ।