बालेन शाहलाई निकै आक्रामक शैलीमा ‘झापामै गोली ठोक्ने वातावरण बनाउनुपर्छ । जहाँबाट गए पनि झापामै गोल ठोक्ने । भन्दै टिकटकमा भएको ग्रुप छलफलको स्क्रिनसर्टको रूपमा हालिएको एक भिडियो निकै भाईरल भयो ।

संवादमा सहभागी एक व्यक्तिले बालेन शाहलाई झापामा छिर्न नदिने र भौतिक आक्रमण गर्ने आश्वासन दिँदै भने , ‘त्यसले पिटाइ खान्छ, ढुक्क हुनु ।’ अहिले यो टिकटक भिडियोमा आएर यसरी बोल्नेहरुमाथि अनुसन्धान शुरु भएको छ । राष्ट्रिय स्वतन्त्र पार्टी (रास्वपा)का वरिष्ठ नेता (बालेन) लाई झापामा गोली हान्ने भन्दै सामाजिक सञ्जालमा भाइरल भइरहेको भिडिओबारे साइबर ब्युरोले अनुसन्धान सुरु गरेको हो ।

टिकटक लाइभमार्फत ज्यान मार्ने धम्की दिइएको विषय सार्वजनिक भएपछि ब्युरोले बुधबारदेखि सूक्ष्म अनुसन्धान थालेको हो । ब्युरोका प्रवक्ता प्रहरी उपरीक्षक दीपकराज अवस्थीले सामाजिक सञ्जालमा प्रमुख शाहमाथि भौतिक आक्रमण गर्ने योजना बुनिएको भन्ने भिडिओका सम्बन्धमा अनुसन्धान भइरहेको पुष्टि गरे । “टिकटक लाइभमार्फत ज्यान मार्ने धम्की दिने कार्य प्रचलित कानुनविपरीत र दण्डनीय छ,” प्रवक्ता अवस्थीले भने, “हामीले यस विषयमा विस्तृत अनुसन्धान गरिरहेका छौँ ।”

भाइरल भिडिओमा केही व्यक्तिले बालेनझापा पुगेको समयमा गोली हान्ने वातावरण बनाउनुपर्ने भन्दै उत्तेजक संवाद गरेका छन् । उनीहरूले शाहलाई लखेट्ने, बाटो छेक्ने, कुटपिट गर्ने र कालोमोसो दल्नेसम्मका धम्की दिएका छन् । अस्ति बालेन आफनो उम्मेदवारी दर्ताको लागि झापामा पुग्दा यो भिडियो एकाएक सामाजिक सञ्जाल फेसबुक र टिकटकमा भाईरल बनेको थियो । खुम झाँक्री मगर नामको फेसबुक आइडीबाट भिडियो अपलोड भएको छ, जसमा ‘बालेन शाहलाई गोली हान्नुपर्छ’ भनेर सम्वाद गरिएको छ ।

अडियोमा एमाले र त्यसका भ्रातृ संगठनहरूको नाम समेत मुछिएको छ । ‘एमालेले ठुलो शक्ति प्रयोग गर्नुपर्छ, साम–दाम–दण्ड–भेद भन्छ, त्यो गर्नैपर्छ । अगाडि पंक्तिमा युथ फोर्स, त्यसपछि भोलेन्टियर फोर्स र त्यसभन्दा पछाडि अनेरास्ववियु गरी तीन लेयर (तह) को तयारी छ ।’ प्रहरीले सामाजिक सञ्जालमा लहडको भरमा कसैलाई ज्यान मार्ने वा भौतिक आक्रमणको धम्की नदिन समेत आग्रह गरेको छ । यस्ता गतिविधिले गम्भीर कानुनी झन्झट निम्त्याउने भन्दै प्रवक्ता अवस्थीले सचेत रहन सुझाव दिएका छन् ।