काठमाडौँ । गुल्मीको सदरमुकाम नजिकै आइतबार बिहान एक पुरुष मृत अवस्थामा फेला परेपछि स्थानीय क्षेत्रमा चासो बढेको छ। रेसुङ्गा नगरपालिका–७ अन्तर्गत अर्घाखाँची जिप पार्क नजिक रहेको सार्वजनिक शौचालयको बाहिरी पेटीमा ती पुरुष मृत भेटिएका हुन्।

स्थानीयका अनुसार बिहान करिब ९:४० बजे सुतिरहेको अवस्थामा अन्दाजी ४९ वर्षका पुर्सबहादुर विक मृत देखिएपछि जिल्ला प्रहरी कार्यालय गुल्मीलाई खबर गरिएको थियो। उनी सोही क्षेत्रको आदर्शचोकका बासिन्दा हुन् र पछिल्लो १–२ वर्षदेखि मागेर जीवन निर्वाह गर्दै आएको जनाइएको छ।

प्रहरी निरीक्षक पर्वत कुमार केसीको नेतृत्वमा टोली घटनास्थलमा पुगेर प्रारम्भिक अनुसन्धान सुरु गरेको छ। जिल्ला प्रहरी कार्यालय गुल्मीका अनुसार मृतकले प्रायः अत्यधिक मादक पदार्थ सेवन गर्ने गरेको जानकारी प्राप्त भए पनि मृत्युको ठोस कारण भने खुल्न सकेको छैन। घटनाबारे थप अनुसन्धान जारी रहेको प्रहरीले जनाएको छ।