काठमाडौँ । मातातीर्थ औँसीका अवसरमा कलाकारहरूको भावनात्मक शब्दहरूले सामाजिक सञ्जाल भरिएको छ। आमाप्रतिको माया, सम्मान र कृतज्ञताले आजको दिनलाई अझ गहिरो बनाएको छ।

आमाको मुख हेर्ने दिनका रूपमा मनाइने यस पर्वमा सर्वसाधारणसँगै कलाकारहरूले पनि आफ्ना भावना खुलेर व्यक्त गरेका छन्। आमा जीवनको आधार, निस्वार्थ माया र प्रेरणाको स्रोत भएकी भन्दै उनीहरूले विभिन्न सन्देशमार्फत सम्मान प्रकट गरेका छन्।

अभिनेत्री पूजा शर्माले आमा यस्तो व्यक्ति भएको बताएकी छन्, जसले सबैको स्थान लिन सक्छिन् तर उनको स्थान कसैले लिन सक्दैन। त्यस्तै, अभिनेत्री केकी अधिकारीले आमाको महिमा शब्दमा बयान गर्न नसकिने भन्दै संसारभरका आमाप्रति सम्मान व्यक्त गरेकी छन्।

गायिका समिक्षा अधिकारीले आफ्नी आमाप्रति समर्पित कविता सार्वजनिक गर्दै, आमा जीवनको सबैभन्दा ठूलो सहारा र शक्ति भएको उल्लेख गरेकी छन्। ‘धन्यवाद शब्द सानो छ… आमा, तिमी नै मेरो संसार हौ’ भन्ने उनको अभिव्यक्तिले धेरैको मन छोएको छ।

मातातीर्थ औँसी प्रत्येक वर्ष वैशाख कृष्ण औँसीमा मनाइन्छ। यस दिन जीवित आमालाई सम्मान गर्ने र दिवंगत आमाको सम्झनामा श्रद्धाञ्जली अर्पण गर्ने परम्परा रहिआएको छ।

आमा—माया, त्याग र प्रेरणाको अनुपम रूप। मातातीर्थ औँसीको हार्दिक शुभकामना।