Jul 28 2026 | २०८३, श्रावण १२ गते
Jul 28 2026 | २०८३, श्रावण १२ गते
काठमाडौँ । राष्ट्रिय गौरवको भेरी–बबई डाइभर्सन आयोजना अपेक्षाअनुसार अघि बढ्न नसक्दा फेरि म्याद थप्ने तयारी गरिएको छ। पटक–पटक समय थपिँदा पनि कुल प्रगति करिब ५० प्रतिशतमै सीमित भएपछि चौथो पटक ठेक्का अवधि बढाउने प्रक्रिया सुरु गरिएको हो।
आयोजना निर्देशक हरिदत्त पौडेलका अनुसार तेस्रो पटक थपिएको म्याद सकिएसँगै विभागमा पुनः म्याद थपका लागि प्रस्ताव पठाइएको छ। अब करिब १० महिनाभित्र बाँकी काम सक्ने लक्ष्यसहित आगामी पुससम्म समय थप्ने सिफारिस गरिएको छ, यद्यपि अन्तिम निर्णय विभागबाट आउन बाँकी छ।
दोस्रो चरणअन्तर्गत बाँध, पावर हाउस र पेनस्टोक निर्माणको जिम्मा पाएको ग्वाङ्डोन–युनाटियन र रमण कन्स्ट्रक्सन जेभीले २०७६ देखि काम गर्दै आएको छ। सुरुमा चार वर्षमै सम्पन्न गर्ने लक्ष्य रहे पनि कोरोना महामारी, डिजाइन ढिलाइ, प्राविधिक समस्या र स्रोत व्यवस्थापनको कमजोरीका कारण काम अपेक्षाअनुसार अघि बढ्न सकेन।
.gif)
आयोजनाका अनुसार सिभिल, इलेक्ट्रीकल र हाइड्रो–इलेक्ट्रीकल काम आपसमा जोडिएकाले एक क्षेत्रमा ढिलाइ हुँदा समग्र प्रगति प्रभावित भएको छ। वर्षायाममा नदीको बहाव, परामर्शदाता परिवर्तन, बजेट अभाव र दक्ष जनशक्तिको कमी पनि ढिलाइका मुख्य कारण मानिएका छन्।
निर्माण कम्पनीले भने आयोजनाकै तर्फबाट ढिलाइ भएको दाबी गर्दै पर्याप्त समय पाए काम सम्पन्न गर्न सकिने जनाएको छ। आयोजनाले अन्ततः ४८ मेगावाट विद्युत् उत्पादन र बाँके–बर्दियाका ५१ हजार हेक्टर जमिनमा सिँचाइ सुविधा पुर्याउने लक्ष्य राखेको छ, तर हालको सुस्त गतिले लक्ष्य हासिल कहिले हुन्छ भन्ने अझै अनिश्चित देखिएको छ।
© 2026 All right reserved to laligurash.com
By 
