काठमाडौँ । अचानक विकसित राजनीतिक घटनाले देशको माहोल तातेको छ, जहाँ नेकपा एमालेले अध्यक्ष तथा पूर्वप्रधानमन्त्री केपी शर्मा ओलीको पक्राउप्रति तीव्र आपत्ति जनाउँदै तत्काल रिहाइको माग गरेको छ।

पार्टीका महासचिव शंकर पोखरेलले आकस्मिक सचिवालय बैठकपछि ओलीलाई गैरकानुनी तरिकाले पक्राउ गरिएको दाबी गर्दै यस कदमलाई लोकतान्त्रिक मूल्य र कानुनी शासनविपरीत भएको बताएका छन्। बैठकले ओलीसँगै कांग्रेस नेता रमेश लेखकको गिरफ्तारीलाई पनि प्रतिशोधपूर्ण, पूर्वाग्रही र गैरकानुनी भन्दै कडा शब्दमा निन्दा र विरोध जनाएको छ।

एमालेले भदौ २३ र २४ गतेका घटनाको छानबिनका लागि गठन गरिएको गौरीबहादुर कार्की आयोगप्रति पुनः असहमति दोहोर्‍याउँदै यसको प्रतिवेदनलाई पूर्वाग्रही र न्यायिक सिद्धान्तविपरीत ठहर गरेको छ। साथै, सर्वोच्च अदालतका बहालवाला न्यायाधीशको नेतृत्वमा नयाँ उच्चस्तरीय छानबिन आयोग गठन गर्न माग गरिएको छ।

पार्टीले गिरफ्तारीलाई नियोजित र निर्देशित कदमको संज्ञा दिँदै लोकतन्त्र, कानुनी शासन र मानवअधिकारको रक्षाका लागि राजनीतिक दल, नागरिक समाज र सर्वसाधारणलाई संयुक्त पहल गर्न आह्वान गरेको छ।

यसैबीच, एमालेले आन्दोलनका कार्यक्रमसमेत सार्वजनिक गरेको छ। आजै अपराह्न ३ बजे देशभरका जिल्ला सदरमुकाममा विरोध प्रदर्शन गर्ने र भोलि दिउँसो १२ बजे प्रमुख जिल्ला अधिकारीको कार्यालयमा विरोधपत्र बुझाउने कार्यक्रम तय गरिएको छ।

वर्तमान परिस्थितिलाई गम्भीर रूपमा लिँदै एमालेले कानुनी र राजनीतिक दुवै मोर्चाबाट सशक्त प्रतिवाद गर्ने स्पष्ट संकेत दिएको छ।