काठमाडौं । क्रिप्टोकरेन्सीमार्फत ठूलो रकमको शंकास्पद कारोबार गरेको आरोपमा बाराको कलैया उपमहानगरपालिका–२० निवासी २४ वर्षीय मोहम्मद सेफ कानुनी कारबाहीमा परेका छन्। उनीविरुद्ध करिब २० करोड रुपैयाँ बराबरको सम्पत्ति शुद्धीकरणको मुद्दा दायर गरिएको छ।

भद्रकाली क्षेत्रबाट मंसिर १० गते साँझ पक्राउ परेका सेफको मोबाइल जाँच गर्दा १९ करोड ८१ लाख ४९ हजार ६८१ रुपैयाँ बराबरको आर्थिक कारोबार देखिएको प्रहरीले जनाएको छ। सोही रकमलाई बिगो कायम गर्दै मुद्दा अघि बढाइएको हो।

जिल्ला प्रहरी परिसर काठमाडौंले तयार पारेको अनुसन्धान प्रतिवेदनका आधारमा सरकारी वकिल कार्यालयले काठमाडौं जिल्ला अदालतमा मुद्दा दायर गरेको हो। पक्राउका क्रममा सेफसँग दुई थान मोबाइल बरामद गरिएको थियो, जसमा क्रिप्टो कारोबारसँग सम्बन्धित विवरण भेटिएपछि डिजिटल फरेन्सिक ल्याबमा परीक्षण गरिएको थियो। परीक्षणका क्रममा थप प्रमाण फेला परेको प्रहरीले जनाएको छ।

प्रहरी बयानमा सेफले अनलाइनमार्फत चिनजान भएका मुराध आलम नामक व्यक्तिसँग मिलेर क्रिप्टो कारोबार गरेको बताएका छन्। नाफा हुने आश्वासनपछि आफू कारोबारमा लागेको र नाफा भएपछि मुराधले मासिक २०० देखि २५० अमेरिकी डलरसम्म दिने गरेको उनले बताएका छन्।