पूर्व प्रधानमन्त्री शेरबहादुर देउवा आगामी फागुनमा हुने प्रतिनिधि सभा निर्वाचन नलड्ने भएका छन् । उनको स्वकीय सचिवालयले देउवा निर्वाचनमा उम्मेदवार नबन्ने जानकारी गराएको हो ।डडेलधुराबाट निर्वाचन लड्दै आएका थिए । कांग्रेसको विशेष महाधिवेशनबाट गगन थापा सभापति भएसङ्गै उनैले उम्मेदवारका टिकटमा हस्ताक्षर गरेका छन् । नयाँ कार्यसमिति अमान्री भन्दै देउवा समूहले अदालतमा रिट दायर गरेको छ । आज उम्मेदवारी दर्ता हुनु अघि देउवाले उम्मेदवार नहुने बताएका हुन् ।

उता देउवाकी पत्नी आरजु राणाले पनि टिकट पाईनन । कैलाली जिल्लामा नेपाली कांग्रेसले आफ्ना उम्मेदवारहरूको नाम टुंगो लगाएको छ ।जिल्लाका ५ वटै निर्वाचन क्षेत्रमा कसलाई उठाउने भन्ने लामो रस्साकस्सी र छलफलपछि पार्टीले आधिकारिक उम्मेदवार चयन गरेको हो । यसपटक पुराना र प्रभावशाली आकांक्षीहरूलाई पछि पार्दै पाँच जना नेताले टिकट पक्का गरेका छन् । 
पार्टीले गरेको निर्णयअनुसार क्षेत्र नम्बर १ मा जनकराज चौधरीले टिकट पाएका छन् ।

यसअघि यहाँबाट ईश्वरी न्यौपाने, डा. रणबहादुर रावल, रामजनम चौधरी र बुद्धिसागर चौधरीजस्ता हस्तीहरूको नाम सिफारिस भएको थियो, तर पार्टीले अन्तिममा जनकराज चौधरीलाई नै विश्वास गरेको छ । यस्तै क्षेत्र नम्बर २ मा विजय स्वारले टिकट पाएका छन् । यो क्षेत्रबाट गोपाल बम, ललिता भट्ट, हिमबहादुर रावल लगायत आधा दर्जन बढी नेताहरूको नाम सिफारिस सूचीमा थियो, तर टिकट भने स्वारको हातमा परेको छ । क्षेत्र नम्बर ३ मा भिम बडुवाल उम्मेदवार बन्ने पक्का भएको छ ।

यहाँ खेमराज डंगौरा थारू, अविनाश चौधरी र झंकरबहादुर शाहको पनि दाबी थियो । पार्टीको बलियो पकड मानिने क्षेत्र नम्बर ४ मा नेता वीर बहादुर बलायरले टिकट पाएका छन् । यहाँ नैनसिंह महर, टेकराज जोशी (प्रदीप) र लोकराज पाण्डेय (आगो) जस्ता नेताहरू पनि सिफारिसमा परेका थिए । तर, बलायरकै नाममा सहमति जुटेको छ ।  सबैभन्दा धेरै चासोको रूपमा हेरिएको क्षेत्र नम्बर ५ (धनगढी क्षेत्र) मा नरनारायण शाह (मनु) ले टिकट सुरक्षित गरेका छन् । यो क्षेत्रबाट कांग्रेस नेतृ डा. आरजु राणा देउवा, नृपबहादुर वड र डिल्लीराज पन्तको नाम सिफारिस भएको थियो । आरजु राणाले भने टिकट पाइनन् ।