काठमाडौँ । नारायणगढ–बुटवल सडकखण्डअन्तर्गत दाउन्ने क्षेत्रमा सोमबारदेखि देखिएको अवरोध अझै हट्न सकेको छैन। शीतलहरका कारण सडक अत्यधिक चिप्लो र हिलो बनेपछि सवारीसाधन सञ्चालन प्रभावित भएको हो।

जिल्ला प्रहरी कार्यालय नवलपरासी (बर्दघाट सुस्तापूर्व) का प्रहरी उपरीक्षक युवराज खड्काका अनुसार दाउन्नेस्थित खुर्सानी खोला आसपास सवारीसाधन उकालो चढ्न र ओरालो झर्न नसक्ने अवस्था सिर्जना भएको छ। सोही कारण सोमबार बिहानदेखि यो खण्ड अस्तव्यस्त बनेको उनले बताए।

तीन दिनदेखि सवारी आवागमन प्रभावित हुँदा यात्रुहरू मर्कामा परेका छन्। प्रहरीले सवारी साधनलाई पालैपालो पास गराउने प्रयास गरिरहेको भए पनि लामो समयदेखि रोकिएका गाडी व्यवस्थापन गर्न कठिन भइरहेको जनाएको छ।