काठमाडौं, राष्ट्रिय स्वतन्त्र पार्टी रास्वपाका नेता गणेश कार्कीले जेन(जी प्रदर्शनमा आफु पनि उत्रिएको भएतापनि आगो लगाउने र ढुंगा हान्ने काम भने नगरेको बताएका छन । उनले तत्कालिन केपी शर्मा ओली सरकारको कुशासन र दमनविरुद्ध आन्दोलनमा आफु उभिएको बताएका छन्।

उनले सामाजिक सञ्जालमा लेख्दै भनेका छन्, अँ, म आन्दोलनमा गएकै हो ।ओली सरकारले शासनभरि नागरिकको अपमान गरेर, २३ गते शान्तिपुर्ण आन्दोलन गर्नेहरूमाथि गोली बर्षाएर मनमा आगो भरेकै हो । २३ गते त्यस्तरी मान्छे नढलाएको भए २४ गते त्यसरी आउने थिएन । त्यो आगोको जिम्मा ओली सरकार र तिनका मतियारहरूको हो ।  अनि जसले मान्छेको ज्यान भन्दा इटाको धुलो र काठको खरानी ठुलो देख्दै हुनुहुन्छ, र आन्दोलनमा जानेहरूलाई खलनायक भन्दै हुनुहुन्छ, पढ्नुहोला, हो, म आन्दोलनमा गएकै हो । कुशासन मच्चाउने, नागरिकलाई छुसी जति पनि नसोच्ने सरकारको विरोध गरेकै हो ।

अनि, नागरिकलाई मान्छे नगन्नेहरू सत्तामा रहुन्जेल, तिनको वरिपरि घुमेर सत्ताको स्वाद चाख्दै तिनलाई उचाल्नेहरू रहुन्जेल, मान्छे ढाल्दै कुर्सीमा टाँसिए पनि कोही सुरक्षित नहुने रैछ भनेर २४ गतेको आगोले देखाएकै हो ।  मैले कतै ढुंगा हानिन, कतै आगो बोकिन, आगो लागेको कुनै स्थानको कम्पाउन्डमा पनि म थीन तर म सहभागी भएको आन्दोलनमा सरकारी दमनमा परेर होस कि जलेर होस्, मान्छे मरेकोमा जीवनभर दुख लागिरहने छ ।

उनीहरूले र उनीहरूका परिवारले न्याय पाउन । कार्कीले सरकारको दमनकारी नीतिलाई दोष दिँदै आन्दोलनमा सहभागी हुनु आफ्नो नागरिक कर्तव्य भएको जिकिर गरेका हुन ।

यता केही दिन अघि मात्र भदौ २३ र २४ को जेनजी आन्दोलनका क्रममा विभिन्न किसिमका अपद्रव तथा आपराधिक गतिविधिमा संलग्न भएका पुर्पक्षका लागि जेल चलान भएका छन । केही दिन अघि मात्र  १२ जनामाथि जिल्ला प्रहरी परिसर, काठमाडौंको हिरासतमै राखेर अनुसन्धान चलिरहँदा पक्राउ परेका ८२ जना हाजिर जमानीमा छुटेका छन । विभिन्न किसिमका दबाबपछि भदौ २३ र २४ का घटनामा संलग्न ८२ जना दैनिक हाजिर जमानीमा छुटेका छन ।

बयान कागज प्रमाणित गरेर आफन्तको जिम्मामा छाडिएका उनीहरुलाई चाहेको समयमा अदालतमा पेश गरिने प्रहरी परिसरस्रोतले जनाएको छ । ८२ भित्र विभिन्न सरकारी तथा निजी भवनमा आगो लगाउने, तोडफोड गर्नेदेखि लुटपाटमा संलग्न व्यक्तिसमेत छन । विभिन्न सामाजिक सञ्जालको अध्ययन र अनुसन्धानपछि पक्राउ परेका ती व्यक्तिमध्ये सबैजसोले घटनामा संलग्नता स्वीकार गरेका छन । तर, कतिपयले अञ्जानबस गएको भनी बयान दिएको प्रहरीले जनाएको छ ।