काठमाडौं, प्रधानमन्त्री सुसीला कार्कीले यस वर्षको विजयादशमीमा टीका नलगाउने भएकी छिन्। उनले भदौ महिनामा भएको 'जेन जि आन्दोलन'का क्रममा धेरै युवाहरूले ज्यान गुमाएको स्मरण गर्दै, आफूले टीका नलगाउने र अरूलाई पनि नलगाइदिने निर्णय लिएकी हुन्।

प्रधानमन्त्रीको सचिवालयद्वारा जारी गरिएको विज्ञप्तिमा भनिएको छ,‘बडादसैं प्रत्येक वर्ष हर्षोल्लासका साथ मनाइने चाड भए पनि हालै सम्पन्न युवापुस्ताको आन्दोलनको क्रममा धेरै युवाहरूले आफ्नो ज्यान गुमाउनु परेको पीडा अझै ताजा छ। तसर्थ, यस वर्ष प्रधानमन्त्रीज्यू स्वयंले बडादसैंको टीका-जमरा नलगाउने निर्णय गर्नुभएको छ, साथै देशवासीहरूलाई टीका लगाउने कार्यक्रम नरहेको जानकारी गराइन्छ।’

विज्ञप्तिमा भनिएको छ कि हालैको अभूतपूर्व युवापुस्ताको आन्दोलनकै जगमा वर्तमान सरकार गठन भएको हो। सरकारले तोकिएको मितिमा प्रतिनिधिसभाको निर्वाचन गराउने कटिबद्धता जनाएको छ, साथै देशमा सुशासन कायम गर्न पूर्ण रुपमा प्रतिबद्ध रहेको उल्लेख गरिएको छ।

प्रधानमन्त्री कार्कीले विजयादशमीको सन्दर्भमा देश र जनताको कल्याणका लागि दुर्गा भवानीले शक्ति प्रदान गरून् भन्ने कामना गर्दै, देशमा शान्ति, स्थायित्व, सुशासन, समृद्धि र विकासको मार्गमा अघि बढ्न सबैमा हार्दिक अपिल गरेकी छन्।

उनले राष्ट्रका सम्पूर्ण नागरिकलाई देश विकासमा सकारात्मक भूमिका खेल्न आग्रह गरेकी छन्।

यसैबीच, हाल नेपालको कार्यवाहक प्रधानमन्त्रीको रूपमा सुसीला कार्कीको नेतृत्वमा अन्तरिम सरकार गठन भएको छ।
भदौ २३ र २४ गतेको ‘जेन जि’ आन्दोलनका कारण ओली सरकारको पतन भएपछि जेन जि आन्दोलनकर्ताहरूको समर्थनमा कार्की प्रधानमन्त्री बनेकी हुन्।

विज्ञप्तिमा भनिएको छ:
“बडादसैं २०८२ को पावन अवसरमा स्वदेश तथा विदेशमा रहनुभएका सम्पूर्ण नेपाली दिदीबहिनी तथा दाजुभाइहरूलाई तथा संसारभर छरिएर रहनुभएका नेपालीभाषी समुदायलाई सुख, शान्ति, समृद्धि, सुव्यवस्था तथा उत्तरोत्तर प्रगतिका लागि हार्दिक शुभकामना व्यक्त गर्दछु।”