काठमाडाैँ, धरान उपमहानगरपालिकाका मेयर हर्कराज साम्पाङले नयाँ राजनीतिक दल दर्ताका लागि निर्वाचन आयोगमा निवेदन दिएका छन्। उनले ‘श्रम संस्कृति पार्टी’ नामक दल दर्ताका लागि आयोगमा असोज ७ गते नै औपचारिक रूपमा निवेदन दर्ता गराएका हुन्। आयोगले उक्त निवेदन प्राप्त भइसकेको र हाल अध्ययनको प्रक्रियामा रहेको जानकारी दिएको छ। साम्पाङले आफू अध्यक्ष रहने गरी दल दर्ताका लागि प्रस्ताव पेश गरेका छन्।  साम्पाङले चुनाव चिन्ह ‘माटोको ढिस्को’ प्रस्ताव गरेका छन् । उनले दिएको  निवेदनमाथि राजनीतिक दल दर्ता सम्बन्धी ऐन तथा नियमावली अनुसार आवश्यक प्रमाण पुगे/नपुगेको अध्ययन भइरहेको र हेरेर निर्णय लिने बताइएको छ ।

२०७९ सालको स्थानीय चुनावमा साम्पाङ लौरो चुनाव चिन्ह लिएर धरान उपमहागरको मेयर लडेका थिए । निर्वाचन आयोगमा अहिलेसम्म दर्ता भएका १२२ दलमध्ये कुनै पनि दलको चुनाव चिन्ह माटोको ढिस्को नभएकाले साङपाङले प्रस्ताव गरेको चुनाव चिन्ह नै कायम हुने सम्भावना बढी छ । स्वतन्त्र उम्मेदवारको रूपमा धरानको मेयर पदमा निर्वाचित भएका साम्पाङले राजनीति तथा सामाजिक परिवर्तनमा श्रम, सेवा र पारदर्शिता मूल आधार हुनुपर्ने मान्यता राख्दै नयाँ पार्टीको तयारी गरेका हुन्।

नयाँ दलको उद्देश्य जनताको प्रत्यक्ष सहभागिता, स्वावलम्बन र श्रमको सम्मानमार्फत समावेशी विकास र सुशासन प्रवद्र्धन गर्नु रहेको बताइएको छ। धरानको खानेपानी समस्या समाधानका लागि आफ्नै अगुवाइमा श्रमदान गर्दै आएका साम्पाङले जनताको साथ र सहभागितालाई प्राथमिकता दिँदै आएको छ। मेयर पदमा निर्वाचित भएपछि उनले कुनै राजनीतिक दलको झन्डा नउचालीकन जनतासँगै सडक, पानीको पाइपलाइन, ढल व्यवस्थापन लगायतका काममा हातेमालो गर्दै आएका छन्। यही शैली र सोचलाई संस्थागत रूप दिनका लागि उनले ‘श्रम संस्कृति पार्टी’ को घोषणा गर्न लागेका हुन्।

पछिल्लो समयमा लोकप्रिय रहेका साम्पाङले राजनीतिक विकल्पका रूपमा स्वतन्त्रता, इमानदारी, जनहित र प्रत्यक्ष सहभागितामूलक राजनीतिको अभ्यास गर्नुपर्ने धारणा राख्दै आएका छन्। दलिय राजनीति प्रतिको व्यापक जनआक्रोश र विश्वासको खडेरीका बीच उनले स्थापीत दलहरूबाट अलग एक ‘पारदर्शी र श्रममुखी’ पार्टीको अवधारणा अघि सारेका छन्। स्रोतका अनुसार, आयोगमा दर्ता प्रक्रियापछि आवश्यक कागजात तथा प्रमाण बुझाउने काम भइरहेको छ । यदि आयोगले अनुमोदन गर्यो भने आगामी दिनमा ‘श्रम संस्कृति पार्टी’ औपचारिक रूपमा नेपाली राजनीतिको एक नयाँ विकल्पका रूपमा उदाउने अपेक्षा समेत गरिएको छ ।