काठमाडौं, स्वतन्त्र ऊर्जा उत्पादकहरूको संस्था, नेपाल (इप्पान) ले देशभरका जलविद्युत् आयोजना असुरक्षित बन्दै गएकाले गृहमन्त्री र ऊर्जामन्त्रीसमक्ष तत्काल सुरक्षा सुनिश्चित गर्न माग गरेको छ।

आइतबार पठाइएको पत्रमा इप्पान अध्यक्ष गणेश कार्कीले निर्माण सम्पन्न, निर्माणाधीन तथा निर्माण प्रारम्भ हुन लागेका आयोजना धेरैजसो अवरोधमा परेको भन्दै चिन्ता व्यक्त गरेका छन्। उनले विभिन्न समूहहरूले अवैध रूपमा १० प्रतिशत निःशुल्क सेयर माग गर्दै आयोजना अवरुद्ध गरेको र यसले लगानीकर्तामा त्रास फैलाएको उल्लेख गरेका छन्।

इप्पानका अनुसार सिन्धुपाल्चोकको भोटेकोशी गाउँपालिकामा अवस्थित ४५ मेगावाट क्षमताको भोटेकोशी जलविद्युत् आयोजना गत १७ दिनदेखि बन्द छ। जेएन-जी नामक समूहले १० प्रतिशत निःशुल्क सेयर माग गर्दै प्लान्टमा ताला लगाएको छ। यसले दैनिक झन्डै ९८ लाख रुपैयाँ बराबरको राजस्व गुमेको र हालसम्म १६ करोडभन्दा बढी घाटा भएको इप्पानले जनाएको छ।

संघले आयोजना बन्द भएपछि आवश्यक मर्मत तथा निरीक्षण गर्नसमेत रोक लगाइएकोप्रति गम्भीर आपत्ति जनाएको छ।

यसका अतिरिक्त, सिन्धुपाल्चोककै जुगल गाउँपालिकामा पनि स्थानीयको नाममा १० वटा जलविद्युत् आयोजनाहरूलाई पत्र पठाएर निःशुल्क सेयर माग गरिएको छ। यसले अन्य स्थानहरूमा पनि उस्तै किसिमका अवरोध बढिरहेको संकेत दिएको छ।

इप्पानले यस्ता क्रियाकलापले परियोजनाको लागत वृद्धि मात्र नभई निजी क्षेत्रको लगानीमा निराशा ल्याएको उल्लेख गरेको छ। पछिल्ला वर्षहरूमा जलविद्युत् आयोजनामाथि तोडफोड, आगजनी, आक्रमणका घटनाहरू बढिरहेको भन्दै यस्तो अवस्थाबाट उन्मुक्ति पाउन सरकारले दीर्घकालीन ऊर्जा सुरक्षा नीति बनाउनुपर्ने माग पनि गरिएको छ।