काठमाडौं,सशस्त्र प्रहरी बल नेपाल, इन्टेलिजेन्स ब्युरोको विशेष सूचनाका आधारमा लागुऔषध कारोबारमा संलग्न दुई व्यक्तिलाई आज दिउँसो काठमाडौंको त्रिभुवन अन्तर्राष्ट्रिय विमानस्थल नजिकैबाट नियन्त्रणमा लिइएको छ।

सशस्त्र प्रहरी बल सिनामंगलबाट खटिएको ९ सदस्यीय टोलीले काठमाडौं महानगरपालिका–९, एयरपोर्ट अगाडि रहेको दर्शन नमस्ते इन होटलमा विशेष अपरेसन सञ्चालन गरी लागूऔषध ब्राउन सुगर को कारोबारमा संलग्न दुई व्यक्तिलाई रंगेहात पक्राउ गरेको हो।

पक्राउ परेका व्यक्तिहरूमा:

• मोहमद अक्टर, उमेर करीब ४० वर्ष, स्थायी ठेगाना: सिरहा नगरपालिका–८, सिरहा जिल्ला

• सामन यादव, उमेर करीब ४२ वर्ष, स्थायी ठेगाना: कमला नगरपालिका–८, धनुषा जिल्ला

दुवै जना असार १२ गते बिहान ८:१२ बजे होटलमा रुम बुक गरेर बसेका थिए। उनीहरूको कोठाबाट तल उल्लेखित वस्तुहरू बरामद गरिएको छ:

• ब्राउन सुगर ४७.०९ ग्राम (प्लास्टिकमा प्याक गरिएका)

• ब्राउन सुगर जोख्न प्रयोग गरिएको डिजिटल तराजु – १ थान

• मोबाइल फोन – ३ थान

• नगद नेपाली रुपैयाँ – १२,१७५

• नेपाली राहदानी – १ थान (मोहमद अक्टरको नाममा)

उक्त व्यक्तिहरूलाई आवश्यक अनुसन्धान र कारवाहीको लागि नेपाल प्रहरी, गौशाला वृत्तमा बुझाएको छ।