काठमाडौँ । रवि लामिछानेलाई थुनामा पठाएको मुद्दाको अभियोगपत्र रकममा पनि चलखेल भएको खुलेको छ । अनुसन्धानमा क्रममा बचतकर्ताको रकम पनि किर्ते गरी राखेको खुल्न आएको हो । रुपन्देही प्रहरीको अनुसन्धानपछि सरकारी वकिलले अदालतमा पेश गरेको अभियोग पत्रमा उल्लेख गरिएको बचत रकम भन्दा बचतकर्ताको रकम कम भएको बचतकर्ताले नै बताएका छन ।  अदालतमा पेश गरिएको अभियोग पत्रमा सहकारी पीडित चञ्चला सेठियाको बचत रकम २२ लाख ४६ हजार ६ सय ३८ रुपैयाँ उल्लेख गरिएको छ । तर आफ्नो बचत रकम जम्मा १२ लाख भएको सेठियाले बताएकी छिन् । अभियोग पत्रको १३ नम्बर पेजमा उनको बचत रकम लेखिएको छ ।  उनको भनाई अनुसार वास्तविक बचत भन्दा १० लाख ४६ हजार बढी रकम उल्लेख गरेर अभियोग पत्र पेश भएको छ ।

यस विषयमा रुपन्देही प्रहरीले भने यस अघिनै अनुसन्धान भएर अदालतमा विचाराधीन  विषय भएकाले अहिले थप भन्न नसकिने बताउँदै आएको छ । सरकारी वकिलको कार्यालयले मुद्दा पेस गर्दा त्यसमा प्रस्तुत गरिएका विषय तथ्यमा आधारित हुनुपर्ने, त्यो नभए अदालतलाई ढाँटेको ठहर्ने केही अधिवक्ताले बताएका छन । अन्य बचतकर्ताको रकम पनि फरक पारिएको हुन सक्ने आशंका सुरु भएको छ । यता रविको मुद्धामा यसअघि नाम नै किर्ते गरिएको खुलिसकेको छ ।  उजुरी दिएका भनिएका एक महिलाले पनि रवि बिरुद्ध आफुले उजुरी नहालेको र नाम नै किर्ते गरिएको आरोप लगाएकी छिन । सुप्रिम सहकारी कै बचतकर्ता रहेकी गीता आर्चायले आफ्नो नाम उजुरीकर्ताको सूचीमा आउँदा आश्चर्यचकित परेको बताएकी छिन । वैशाख १६ गते रविविरुद्ध पूरक जाहेरी दिएको भनिएका ७ जनामध्येका नारायण पहराईले यस्तो आरोप लगाएका थिए । उनको नाम ७ जनामध्ये पहिलो नम्बरमा थियो । आफूले बचत फिर्ताका लागि निवेदन दिएको तर रवि विरुद्ध कुनै उजुरी नगरेको उनको भनाइ छ । वैशाख २७ गते जाहेरीको १६ औँ नम्बरमा नाम रहेकी गीता आचार्यले उस्तै दाबी गरेकी हुन् । उनले पनि बचत फिर्ताका लागि हालेको उजुरीलाई प्रहरीले अनुमतिविना रविविरुद्ध प्रयोग गरेको बताएकी छन् । एकपछि अर्को उजुरीकर्ताले यस्तो लगाउँदा रुपन्देहीमा प्रहरीले गरेको सहकारी ठगीको अनुसन्धानमै गम्भीर प्रश्न चिन्ह खडा भएको छ । रवि लामिछानेलाई नै फसाउँने नियतले यस्तो गरेको भन्दै सरकारको र प्रहरीको बिरोध भैरहेको छ । सहकारी ऐनअनुसार सहकारी रकम बचत अपचलनको मुद्दा सहकारीका सञ्चालक, व्यवस्थापक वा कर्मचारीलाई मात्र लाग्नेमा सहकारीसँग सम्बन्ध नै नरहेका रविविरुद्ध लगाइएको छ ।